Sorkarin LS Deputy Speaker post a la ngaihsak lo

Central-a BJP kaihhruai NDA sorkar chuan Lok Sabha deputy speaker tur chu ruat mai a la tum lo niin a lang. NDA hian he post hi an lam ṭang tan nge, eptu lam INDIA bloc tan a pek dawn engmah a la sawichiang lo.

Deputy Speaker ruat a nih dawn leh dawn loh chungchangah sorkar lamin sawi la nei lo mah se, Thawhṭannia Speaker Om Birla-a'n House inrelbawlna kalpuina kawnga puitu tur, panel of chairperson a ruat avang khan sorkar lam hian deputy speaker dah hi a duh lo zawk niin a lang.

Tih dan phungah chuan Lok Sabha Deputy Speaker hi eptu lam chanah an dah ṭhin. Mahse BJP kaihhruai sorkar hian 17th Lok Sabha-ah pawh khan deputy speaker hi a ruat lo a ni.

June 26-a 18th Lok Sabha Speaker tur thlan dawnah pawh khan, eptu pawl INDIA lam chuan deputy speaker post hi eptu pawl lam tana dah a nih chuan, NDA-in Speaker atana a nominate chu an thlawp ve nghal tur thu pawh an lo sawi tawh a ni. Mahse BJP lam hian engmah an tiam theih loh avangin, INDIA chuan Lok Sabha Speaker candidate tur hi a ruat zui a, kum rei tak hnuah Lok Sabha Speaker post inchuh an awmna a ni zui bawk. Mahse voice vote hmangin NDA candidate, Om Birla chu thlan tlin a ni zui ta a ni.