Sorkar laipuiin airport leh airlines enkawl tum tawh lo
Sorkar laipui chuan airport leh airlines neih a tum tawh loh thu Civil Aviation minister Hardeep Singh Puri chuan Pathianni khan a sawi a, kumin chhungin Air India pawh privatise hman tum a nih thu a sawi bawk.
Namo app kaltlanga virtual meeting neihah minister Puri chuan sorkarin airport enkawl neih a tum tawh loh thu leh airlines enkawl pawh a neih tawh dawn loh thu hi a sawi a ni.
August 25 khan sorkar laipui chuan Air India chu mimal kuta hlan a nih theih nana enkawl duhten tender an chhan theih chhung chu thla hniha pawtseiin, October 30 thleng a hawng. Hei hi ram chhunga Covid-19 hri leng vang a ni. Kumin January 27 thleng kha tender chhan theih hun a ni a, mahse hri leng vanga pawhsei niin, ṭum li lai sorkar hian a pawtsei tawh.
Nikum February thla khan sorkar laipui chuan Lucknow, Ahmedabad, Jaipur, Mangaluru, Thiruvananthapuram leh Guwahati airport chu mimal kutah a hlan fel tawh a, heng airport-te enkawl tur hian Adani Enterprises thlan a ni. Nikum July thla khan Union Cabinet chuan Ahmedabad, Mangaluru leh Lucknow airport chu Adani Enterprises kuta hlan a nih theih nan a pawm fel tawh bawk.
August 19 khan Union Cabinet chuan Thiruvananthapuram airport chu public-private partnership (PPP) model hmanga Adani Enterprises kuta hlan a nih theih nan a pawm a, he Enterprise hian kum 50 chhung atana a enkawl dawn a ni. Mahse cabinet thutlukna hi Kerala sorkar chuan nasa takin a dodal thung. Cabinet chuan airport dang pathum chu mimal kuta hlan a nih theih nan a pawm tawh bawk a ni.
Covid-19 hri leng vangin ram chhungah thla hnih vel thlawhtheihna thlawh khap a nih hnuah, May 25 aṭang khan ram an thlawk ṭan leh a ni. Mahse airlines-te chu hri len hmaa ramchhunga thlawhtheihna an thlawh tir ṭhin aia tlem, an thlawhtheihna 45% aia tam lo thlawhtir phalsak an ni.
Sep 30 thleng internationalcommercial flight la khap
Director General of Civil Aviation (DGCA) chuan Thawhṭanni khan thuchhuah tichhuakin, international commercial flight chu tun thla, Sepember 30 thleng khap rih a nih thu a tarlang.
Bungraw phur leh special flight bik erawh DGCA chuan khap zingah a tel loh thu a tarlang a, mahse hengte pawh hian sorkarah phal an nei hmasa tur a ni, tiin thuchhuah chuan a tarlang bawk.