Manipur chungchangah Congress-in RS-a PM thusawi an chhang

Congress party chuan prime minister Narendra Modi-a'n Nilainia Rajya Sabha-a thu a sawiah, Manipur buaina chu a ziaawm chho zel a, sorkar laipui chuan boruak ṭha leh nunphung pangngai awm tir leh ngei a tum a ni, tia a sawi chu an chhang let nghal.

Congress general secretary, Jairam Ramesh chuan PM thusawi hi chhangin, Manipur state chhung dinhmun a la ṭha lo hle a, nikuma buaina a chhuah tir aṭang khan PM hian Manipur hi a la tlawh miah lo tih a sawi.

"Hun rei tak he buaina chungchang a ngawihsan hnuin, Rajya Sabha-ah thu a sawiah Manipur chu a pangngai chho tawh niin a rawn sawi a ni. A takah chuan boruak a la ṭha lo hle a, hei hi Inner Manipur MP ngei pawhin Lok Sabha-ah a sawi chhuak a ni," a ti. Parliament joint sitting hmaa President-in thu a sawiah pawh Manipur chungchang hi a lang lo tih a sawi bawk.

INDIA bloc chuan Modi kaihhruai sorkar laipui chu Manipur ngaihthahah an puh a, PM ngei pawh Manipur chungchangah hian an au khum bawk.

Ramesh chuan, 'Kum 2023, May 3 aṭangin Manipur hi a buai a ni. PM in Rajya Sabha-a Manipur dinhmun a sawi dan chu a taka thleng mek nen a letling thawk a ni. Hnam inkarah buaina a awm a, tharum thawhna a la thleng reng. Kum 2022, February thlaah BJP leh a thurualpuite chuan inthlanah vote tla aṭanga hmun thuma ṭhena hmun hnih aia tam an hmu a, thla 15 hnuah Manipur a buai zui nghal. Vawiin thlengin Prime Minister chuan a la tlawh lo bawk," a ti.

Congress MP Gaurav Gogoi pawhin Lok Sabha-a Leader of Opposition, Rahul Gandh-a'n Outer Manipur MP, Alfred Arthur chu thusawina hun pe tura a phut chung pawhin pek a ni lo, tiin a sawi ve bawk.