India leh China foreign minister-ten ramri buaina chinfel thuai duh

Kazakhstan-ah India leh China foreign minister-ten meeting an neihah, ram pahnihte ramri chungchanga buaina an neih chu a rang lama chinfel an duh thu an sawi.

External affairs minister S Jaishankar leh China foreign minister Wang Yi te chu Astana, Kazakhstan-a Shanghai Cooperation Organisation summit an neih karlakah nimin khan inhmuin, ramri chungchang hi an sawi dun a ni. Minister-te hian ramri buaina chinfel thuai dan ngaihtuah turin ram pahnih palaite bakah, sipai official-te meeting pawh huam zau zawka neih an remti a ni.

Laskha khawchhak lama India leh China-in ramri buaina a neih hi kumin May thla kha a kum ngana a ni. Kum 2020 khan Galwan Valley sector-ah ram pahnih sipaite inkarah buaina nasa tak a chhuak a, he thil thleng vang hian ram pahnihte pawhin helai ramria an sipai dah hi an tipung ve ve bawk.

Ram pahnihte ram inchuh hmun ṭhenkhat aṭangin sipaite hi lak chhuah ni mah se, Line of Actual Control (LAC)-a hmun eng emaw zatah erawh buaina an la nei zui zel. Jaishankar chuan ramri-a buaina an neih reng chu ram pahnihte tan pawh hian a ṭha lo ve ve tih pawh a lo sawi tawh a ni.

Jaishankar hian SCO annual summit hmang tur hian Thawhlehni khan Kazakhstan hi a thleng a, Kazakhstan foreign minister Murat Nurtleu nen pawh meeting nei tawhin, ram pahnihte inlaichinna leh thawh dunna chungchangte an sawi dun a ni.