Uttarakhand-ah ruah sur nasa vangin kawng 100 chuang a ping

Uttarakhand state-ah ruah sur nasa avangin kawng 100 chuang a ping a, state chhung lui hrang hrangte chuan hlauhawm chhinchhiahna an pel tawh bawk.

Uttarakhand Meteorological Department chuan Champawat, Almora, Pithoragarh, Udhamsingh Nagar leh Kumaon region-ahte ruah hi a la sur belh nasa dawn tih sawiin, Dehradun, Pauri, Tehri leh Haridwar tan orange alert a ti chhak bawk.

Ganga, Alaknanda, Bhagirathi, Sarada, Mandakini leh Kosi lui an lian a, hei vang hian kawngpui tam tak khar a ni. Darkar 24 chhungin ruah hi Chaukhutia-ah 72.5 mm, Bhansiachana-ah 62 mm, Lohaghat-ah 59 mm, Champawat-ah 45 mm, Kashipur-ah 42 mm, Bhimtal-ah 38 mm, Haldwani-ah 31 mm leh Chamoli-ah 26 mm te a sur a ni.

Rudraprayag district-ah chuan Alaknanda lui tui lianin feet 10-a sang, Lord Shiva lim pawh a chim pil a ni. Department of Meteorology and Disaster Management chuan mipuite chu hmun hniam lam leh lui kamahte kal lo turin an chah a, National Disaster Rescue Force pawh a ṭul huna che chhuak mai tura inring tura hriattir an ni bawk.