Education Minister hoin textbook tihkhawtlai chungchang ngaihtuah

Union education minister Dharmendra Pradhan hoin Ningani khan ministry-a senior official-te chuan textbook tihkhawtlai chungchang an ngaihtuah.

He meeting-ah hian School Education and Literacy Secretary, NCERT Director leh Central Board of Secondary Education (CBSE) Chairperson pawh an tel.

National Council of Educational Research and Training (NCERT)-a National Syllabus and Textbook Committee (NSTC) in textbook hi a la tih fel loh avangin, tun thlengin Class 6 zirlaite chuan Social Science, Maths leh Science textbook an la nei lo. 2024-25 academic year hi July thla aṭanga ṭan niin, school hawn a ni tawh chungin, zirlaibu nei loin an la awm a ni.

Ministry of Education chuan nikum November thla khan 2024-25 academic year-ah Classs 1-12 zirlaibute chu NTS nen ennawn a, textbook thar siam a nih tur thu a sawi. Mahse NCERT chuan kumin bikah chuan Class 3 leh 6 tan chauh zirlai bu thar siam a nih tur thu a sawi. NSTC hi Class 12 thlenga zirlaibu siamtu a ni. Hetih lai hian school luh ṭan a nih hnuah pawh Class 6 zirlaibu tur ṭhenkhat hi an la peih fel hman lo a, peihfel thuai a ni dawn niin an sawi.

Textbook tharte hi April leh May thlaa tih chhuah hman tura tih ni mah se, NCERT hian academic year thara Class 6 zirlai tur hi English leh Hindi chauh a la ti chhuak a ni.

NSTC hian Class 12 thleng textbook thar tur hi a buaipui meka, mahse hman tura peihfel tur chuan kum hnih vel hun an la duh dawn nia sawi a ni bawk.

Congress-in naupang zirna tibuaiah puh

Congress party chuan Class 6 textbook thar tur tikhawtlai a nih chungchangah BJP kaihhruai sorkar laipui chu bei nghalin, Education Ministry chu naupangte zirna tibuaiah a puh.

Congress general secretary, Jairam Ramesh chuan exam kalphung an tihbuai hnuah, non-biological PM hnuaia Education Ministry chuan kan fate zirna an tibuai leh ta a ni, tiin X-ah a post.

'School ṭan a nih tawh hnuah, NCERT chuan Class 6 zirlai tan Science, Mathematics leh Social Science textbook a chhu chhuak hman lo a ni," tiin, hengte hi buai nghal pawh ni se a buaipui chhung hi ni 10-15 vel a awh leh dawn a ni, a ti.