Hathras inpawngnekna chungchangah SIT-in report thehlut

Uttar Pradesh-a Hathras-a sakhaw thila pungkhawmte inpawngnekna thleng vanga mi 123 thihna thleng chungchang chhui chiang tura ruat, Special Investigation Team (SIT) chuan chief minister Yogi Adityanath hnenah report an theh lut.

Hathras-a inpawngnekna hi Thawhlehnia thleng kha niin, self-styled god Bhole Baba, a hming tak Surja Pal-a inkhawm buatsaih, 'satsang' a kalte an ni. Inpawngnekna thleng chungchang chhui tur hian state sorkar chuan SIT hi ruatin, darkar 24 chhunga report thehlut tura tih an ni bawk. Nimin zing khan UP DGP Prashant Kumar leh chief secretary Manoj Kumar Singh-te chuan phek 15-a chhah report hi CM Adiytanath hnenah a hlan a ni.

Report-ah hian mi 100 thu zawhfiahna pawh dah niin, DM leh SP thusawite pawh dah a ni bawk.

Chief Minister chuan Nilaini khan Hathras hi tlawhin, hliam tuarte leh mitthi chhungte a tlawh. He thil thleng chungchanga judicial inquiry nei turin thupek a siam bawk a ni. SDM chuan Bhole Baba 'satsang' neih tur atan hian mi 80,000 chin pun khawm phalna an pe tih a sawi a, mahse an hun buatsaiha kal khawm hi mi nuai 2.5 chuang an tling niin a sawi.

Congress party hruaitu leh Lok Sabha-a Leader of Opposition, Rahul Gandhi pawhin Aligarh leh Hathras hi a tlawh a, chhiat tawk chhungte a tlawh bawk a ni.

Inpawngnekna thlenga mi 100 chuangin nunna an chan hnuah, Bhole Baba hi chin hriat lohin a la bibo a ni. Hetih lai an inkhawmnaa thil thleng chu buaina siamtute thiltih niin thuchhuah a siam bawk. Police-ten thubuai an ziahluhah pawh Bhole hming hi sawilan tel a ni lo.