Hathras Inpawngnekna : A ṭul a nih chuan Bhole Bola pawh thu zawh a ni ang - Panel

Uttar Pradesh-a July 2-a self-styled godman, Bhole Bola hnungzuituten Hathras-a inkhawm an neiha inpawngnekna thleng vanga mi 121 thihna thleng chungchang chhuitu, judicial commission chuan an thil chhui mekah a ṭul a nih chuan Bhole Bola pawh thu zawhfiah tura koh a ni dawn tih an sawi.

Commission hian an thil chhui mek chungchangah mipuite tan hriattirna tih chhuah thuai an tum bawk a, tualchhung mi leh, chhiatna thleng mita hmutute chu an thil hmuhte hriattir turin an ngen dawn tih panel chairperson, Allahabad High Court judge hlui, Brijesh Kumar Shrivastava chuan a sawi.

Member pathum awmna,judicial commission-ah hian chairperson bakah IPS officer hlui Bhavesh Kumar leh IAS officer hlui Hemant Rao-te chu member an ni bawk. Nimin khan Hathras tualchhung mite bakah, official leh chhiatna thlen dan mita hmutute an kawm a ni.

Shrivastava chuan thla hnih chhungin an thil chhuina report chu an thehlut dawn tih a sawi a, chhiatna thlenna hmun pawh an enfiah tawh a ni. Inpawngnekna thleng kaihhnawihah hian police-te chuan mi pakua an man tawh a, a mawhphurtu bera puh Devprakash Madhukar pawh man zingah hian a tel.

Madhu hi July 2-a Bhole Baba 'satsang' (prayer meeting) neiha a huaihawttu niin, thuneitute hnen aṭangin mi 80,000 chin punkhawm phalna a neih laiin, inkhawm an buatsaihah hian mi nuai 2.5 chuang an kal khawm niin official-te chuan an sawi.

Uttar Pradesh sorkar chuan he chhiatna thleng chhui tur hian Special Investigation Team (SIT) a ruat bawk a, SIT hi addition director general of police (Agra zone) Anupam Kulshrestha-a'n a ho a ni.

Rahul Gandh-a'n zángnadawmna tipung turin phût

Lok Sabha-a Leader of Opposition, Congress party hruaitu Rahul Gandhi chuan Uttar Pradesh chief minister, Yogi Adityanath hnenah Hathras inpawngnekna thlenga thi chhungte hnena zángnadawmna pek chu tipung turin a ngen. Hei bakah hian he chhiatna thlenga mawhphurtute chu hremna na tak pe turin a phut bawk.

Gandhi hian CM Adityanath hi lehkha thawnin, thi chhungte zángnadawmna ṭha tak pek leh, hliam tuarte pawh enkawlna ṭha tak pek an ṭul thu a sawi. Uttar Pradesh sorkarin zángnadawmna pek tur a lo puan tawh chu a tlem tih sawiin, a rang thei anga berin an sum pek tur hi tipung turin a ngen. Gandhi hian inpawngneknaa thi chhungte hi a lo tlawh tawh bawk a ni.

CM Adityanath hian inpawngnekna thlenga thi chhungte hnenah zángnadawmna, Rs nuai 2 ṭheuh leh hliam tuarte Rs 50,000 ṭheuh pek an nih tur thu a lo puang tawh a ni.