Surat-a in chimah mi 7 an thi

Surat, Gujarat-ah ruah sur nasa avangin Inrinni khan in chhawng ruka sang a chim a, in chimah hian mi pasarih an thi a, hliam 15 an awm.

Official-te chuan he in chim hi Sachin Pali khuaa phalna nei loa sak niin an sawi a, apartment 30 awmin, a chim lai hian flat panga luahtu an awm. Kum 2017-a sak niin, a luah tute hian thla khatah luah man Rs 1,200 an pe ṭhin. Kumin kumtir lam khan Surat Municipal Corporation chuan he building hi a him lo tiin hriattirna pawh an lo pe tawh a, mahse in neitu leh a enkawltute hian siamṭhat emaw, ṭhiah emaw tumin hma an la zui chuang lo niin official-te chuan an sawi.

Chief fire officer, Basant Pareek chuan nimin zing dar 6 khan in chim aṭang hian ruang pasarih hi lak chhuah kim an ni tawh tih a sawi. Mitthite hi an nihna pawh hriat chian vek ni tawhin, kum 22-27 inkar vek an ni a, an bul hnaia textile industry-a inhlawhfate an ni.

Gujarat police-te chuan building neitu, Ramaliben Kakadiya leh a fapa, Jay-te chu Sachin GIDC police station-ah thubuai siamsak an ni tih sawiin, in chim kaihhnawihah hian mi pakhat man a ni tawh tih a sawi bawk. An mi man hi Ashwin Vekariya niin, building chima khawsate hnen aṭang hian a luah man a lo la ṭhin a ni.