President-in Delhi sorkar bill a hnawlsak MLA 21-te ban an ni mai thei

Delhi-a Aam Aadmi Party (AAP) sorkarin 'Office of Profit' law siam- ṭhatna bill a thawn chu a pawmpui lo a, hei vang hian AAP MLA 21, nikuma Parliamentary secretary atana ruatte dinhmun tur chu sawichian theih a ni ta rih lo a ni.

Mipui aiawh tura thlan tlinte zing≠ah office of profit lo chelh tel hi ram danpui palzutna a ni. Ram danpui chuan MP emaw, MLA emaw te chu sum lakluh belhna emaw, hamṭhatna emaw hna an thawh a remti lo a ni.

Delhi Assembly chuan nikum khan parliamentary secretary hna chu 'office of profit' list aṭanga paihna tur bill a lo pass tawh a, mahse president-in a pawmpui a ngai a ni. Assembly-in a pass hnuah bill hi president hnenah hian thawn a ni a, mahse president hian a lo hnawlsak a ni.

President office chuan Union Home leh Law ministry-te chuan office of profit aṭanga parliamentary secretary hna paih tumna chu dan hman mek kalh a ni tih an sawi a, hei vang hian Delhi sorkar bill pawh hi a pawmpui thei ta lo niin a sawi.

President hian bill a hnawlna lehkha hi Delhi sorkar hnuaia Law Department-ah thawn a ni a, an ni hian a ṭul angin hma a lo la dawn a ni. President office chuan MLA 21-te chu ram danpui kalha office of profit an luah tiin, MLA an nihna hnawlsak tura ngenna a thehlut nghal nia sawi a ni bawk.

Union Home Ministry chuan President-in bill a hnawl avang hian MLA-te hi automatic-in MLA an nihna aṭanga ban nghal an ni, a ti. Hei vang hian Delhi-ah assembly inthlan buatsaih ṭhat a ngai dawn a ni, a ti. AAP hian assembly seat 70 awmnaah hian MLA 67 a nei a ni. Mahse MLA-te ban leh ban loh chung≠changah hian Election Commission chu thutlukna siamtu tur a ni ang.

AAP chuan President-in an bill a pawm tak loh avang hian emergency meeting an nei nghal a, President chuan Narendra Modi-a kaihhruai NDA sorkar thurawn angin bill hi a hnawl niin an puh. Chief Minister Arvind Kejriwal-a pawhin PM Modi chu na taka beiin, democracy zahna nei lo leh, AAP hlauah a puh.

Kejriwal-a chuan MLA-te hian Parliamentary secretary atana ruat an nih vang hian pawisa cheng khat pawh pek belh an ni lo a, car leh bunga≠loaw pawh pek an ni lo tih sawiin, a thlawnin he hna hi an thawk a ni, a ti. Heng MLA-te hi power supply, water supply, hospital leh school te enkawl hna thawk tura dah an ni, a ti.

Delhi CM chuan Haryana, Nagaland, Rajasthan leh state dang, parliamentary secretary neihna state-ah te eng vanga action la lo nge an ni tih a zawt leh nghal bawk. Kejriwal chuan, "Haryan, Punjab, West Bengal leh state dang dangah pawh parliamentary secretary hi an nei vek a ni. Punjab-ah chuan thla khatah cheng nuai khat hlawh tir an nih bakah, car leh bungalow pawh pek an ni. Mahse heng MLA-te hi ban an ni chuang lo. Engvangin Delhi-ah chauh action lak tum a nih? A chhan chu Modi hian Aam Aadmi Party hi a lo hlau em a ni" a ti. PM Modi chu Delhi sorkar hna thawk thei loa siam tumah a puh.

President-in Delhi sorkar bill a lo hnawlsak chungchangah pawh thutlukna siamtu chu BJP kaihhruai NDA sorkar vek a ni tiin, "File pawh hi President hnen a thleng kher lo ang. A hmingin an lo ti vek a ni. He thutlukna hi Ministry of Home Affairs siam vek a ni" tiin a sawi.

Election Commission chuan MLA-te ban leh ban loh chung≠changah hian thutlukna a siam dawn a, MLA 21-te hnena hian EC chuan hriattirna pein, heng MLA-te pawh hian an insawifiahna an thawn let vek tawh a ni.