JNUSU President-in PM hnenah lehkha thawn

Jawaharlal Nehru University (JNU) Students' Union president Kanhaiya Kumar chuan Prime Minister Narendra Modi chu sawiselin, a kaihhruai sorkar a din hnunah university hrang hrangah emergency hun lai ang maiin boruak ṭha lo a awm a, ram inthlak danglamna chu sa emaw, video emaw thlak danglam hmang chuan a thlentir lo ang, a ti.

PM Modi hnena open letter a thawnah, Kanhaiya chuan Uttar Pradesh-a bawngsa kawla puh a nih avanga Muslim mi pakhat sawisak hlum a nih chungchang te, February 9-a JNU campus-a zirlaiten inkhawm an buatsaih a, ram phatsan zawnga thu sawia an puhna video siamchawp a nih chungchangte a sawilang a ni.

Kanhaiya chuan sa emaw, video emaw siam danglam ringawt chuan ram chu a siam danglam dawn lo tih a sawi a, ram mipuite dinhmun chawikan a nih hunah chauh ram chu siamṭhat a ni ang, a ti. "Zirlaite leh ṭhalaite chuan beiseina sang tak nen kan thlang tling cheu a, mahse i rorelna hnuaiah chuan boruak a chhe zual zel zawk a ni" a ti.

February 9 zana JNU campus-a zirlai pawl pakhatin inkhawm a buatsaih a hmanpuinaah Kanhaiay hi ram phatsan zawnga thu sawiah puhin man a ni a, tunah hian bail-in a chhuak mek a ni.

JNUSU president chuan BJP kaihhruai NDA-in kum hnih ro a rel chhungin sorkar fakna thu chhuahna atan ringawt sum tam tak a seng tawh tih a sawi. "In intiam anga ram tana hmasawnna tak tak thlen ni ula, sorkar fakna thu chhuahna atan hian cheng vaibelchhe tel in seng lo ang. Zirlai ka nih angin zawhna ka zawt duh che u a ni. Advertisment atan cheng vaibelchhe 200 in seng tawh a, mahse research scholar-te tan non-NET scholarship pek tur cheng vaibelchhe 99 pek tur in nei thei si lo" a ti. Hna siam thar a awm lo a, loneitute chu an dinhmun retheih avangin an intihhlum belh se la, mi retheite dinhmun a harsa zual zel a, zirlaite tan lehkha zirna senso a hautak telh telh tawh a ni, tiin Kanhaiya chuan a sawi.