NCW chief chungchanga a thu post avangin Delhi Police-in Mahua Moitra lakah FIR ziak lut

Delhi Police-a Special Cell chuan Trinamool Congress (TMC) MP Mahua Moitra chu social media-a National Commission of Women (NCW) chief Rekha Sharma chungchang a post dan avangin Pathianni khan a lakah FIR an ziak lut.

NCW hotu, Rekha Sharma hian July 4 khan Uttar Pradesh-a inpawngnekna thleng vanga mi tam tak thihna thlenna hmun, Hathras a tlawh a, chhiatna thlenna hmuna an awm lai hian staff pakhatin a bula ding a, nihliap a vawnsak lai video chu social media lamah a darh nasa hle. Mi tam takin sawi zuin, NCW hotu hian a nihliap khum tur pawh a keng thei lo em ni titein an sawi zui a ni. TMC MP Moitra hian post pakhat chu lo react-in, NCW hotu hi a bei zui a 'A boss pyjama kengin a buai lutuk a ni e,' a lo a ti a ni. A hma aṭangin eptu party-te chuan Rekha Sharma hi a BJP kaihhruai NDA sorkar duh dan anga engkim tiah an lo puh tawh ṭhin a ni.

Mahua Moitra thu post hi ṭawngkam mawi lo leh intihhmingchhiat tumna ani tiin, commission hian July 5 khan a laka action lak phutin FIR an thehlut a ni. Sharma pawh hian Lok Sabha Speaker Om Birla leh Delhi Police Commissioner Sanjay Arora hnenah Moitra thusawi chungchangah complaint a thehlut zui bawk.

Moitra hian Delhi Police-in a laka FIR an ziah luh hnu hian a X-ah Rekkha Sharma-i'n eptu hruaitu, Arvind Kejriwal leh a nupui, Sonia Gandhi leh Lalu Prasad-te chungchang mawi lo taka a lo sawi tawhna screenshot eng emaw zat a rawn post zui. Rekha Sharma zawk chu mi tam tak pawisawitu a ni tiin,Delhi police-te chu dan thar hnuaiah Sharma lakah FIR ziak turin a phut let a ni.