SC-in menstrual leave model policy siam turin sorkar hriattir

Supreme Court chuan nimin khan sorkar laipui chu state sorkar leh stakeholder dangte berawnin, hmeichhe hnathawkte tana thi an neih laia chawlh an lak theih dan tur, menstrual leave model policy siam turin a hriattir.

Chief Justice of India DY Chandrachud leh justice pahnih- JB Paridwala leh Manoj Misra te awmna bench chuan menstrual leave chungchanga petition thehluh an ngaihtuahnaah hei hi an sawi a ni. Menstrual leave chungchang hi policy kaihhnawih zawk a ni a, court in a lo buapui tur a ni lo, an ti. Court-in chawlh hi a lo pek ve ngawt chuan, an humhim duh hmeichhiate tan an hnathawhna kawngah harsatna a siam thei zawk dawn a ni tiin, hei chu sorkar policy tur a ni, an ti.

Kumin February thla pawh khan Supreme Court hian hmeichhe zirlai leh hnathawkte tana menstrual pain leave chu state tinin siam tura phutna petition a lo ngaihtuah tawh bawk a, hemi ṭum pawh hian tuna thutlukna a siam ang bawk hian hemi chungchang chu court ni loin, policy-a telh tur zawk a nih thu a lo sawi tawh a ni.

India ram state zingah Bihar leh Kerala chauhin menstrual leave lak theihna dan hi an la nei. Bihar hian hmeichhia hnathawkte tan an thi neih laiin ni hnih chawlh lak a phalsak a, Kerala hian zirlai hmeichhiate chu ni thum chawlh lak a phalsak bawk.