Mumbai-ah ruahsur nasain nunphung a tibuai

Mumbai khawpuiah ruah sur nasa avangin khawpui chhungah tui a tling nasa hle a, rel leh thlawhtheihna service thlengin a nghawng a ni. Nimin zing dar 1- 7 inkarah khan Mumbai khawpui chhung hmun ṭhenkhatah chuan ruah 300mm a tla hman a ni.

Chief minister Eknath Shinde chuan mipuite chu ṭul leh pawimawh tak a nih loh chuan an in chhuahsan rih lo turin a ngen a, Police Commissioner hnenah pawh tumah tuipui kama an kal phal lo turin a ti bawk. Nimin bik atan khan Mumbai, Ratnagiri leh Sindhudurg district-ahte school khar a ni.

Chief Minister chuan khawpui chhunga tui tling leh, ruahsur chhunzawm zel avanga harsatna tawkte pui turin chhanchhuah hna thawktute lam pawh an inring reng tih a sawi. Rel kawngte chu hmun tam takah tuiin a chim a, Railway, NDRF leh civic official-te chuan tui tling paih hna hi an thawk mek a ni, a ti. Ruahsur vang hian flight 50 vel cancel a ni tawh. Raigah hill fort-ah khualzin leh trekker eng emaw zat tangkhang chu police leh district thuneituten an hruai chhuak bawk a ni.

Shinde chuan department hrang hrangte a bepawp reng a, state pum dinhmun pawh an thlithlai reng niin a sawi bawk. Tuipui kam lamah chuan orange alert tih chhuah a ni tawh a, Army, Navy leh Air Force pawh inralring tir an ni tih a sawi.

Maharashtra Assembly leh council session neih mek pawh ruah sur vanga member leh official-ten legislature complex an thlen theih loh avangin nimin khan tihtawp lailawk a ni.