Congress-in PM Modi Moscow zin an sawisel

Prime minister Narendra Modi chu nimin khan Russia khawpui, Moscow-ah a zin a, hei hi Congress party chuan na takin an bei zui nghal a ni.

Congress party chuan PM Modi-a'n Moscow a pan laiin, Congress hruaitu Rahul Gandhi chuan nikum May thlaa Manipur tualchhung buaina a chhuah hnua a ṭum thumna turin Manipur lam a pan thung tih an sawi. PM chuan darkar reilote chauh pawh awm turin Manipur tlawh tumna a la nei lo, an ti.

Party general secretary, Jairam Ramesh chuan, "Vawiin hian non-biological PM chu Moscow lamah a kal a, Lok Sabha-a Leader of Opposition chuan Assam leh Manipur lam a pan thung. Non-biological PM faktute chuan Russia-Ukraine indona chu a titawp thei niin an sawi a, tuna a zin chungchangah pawh hian thu mak tak tak an rawn phuah chhuak leh ngei ang," a ti.

PM Modi hian Russia president Vladimir Putin sawmna angin 22nd India-Russia Annual Summit nei turin Russia a pan a, summit hi nimin leh vawiin hian neih a ni ang.

Congress party hian Manipur tualchhung buaina nasa tak a chhuah aṭanga thla tam tak a liam hnuah pawh tun thlenga Prime Minister Modi-a'n a la tlawh lo hi an sawisel fo a ni. Rahul Gandh pawhin BJP kaihhruai sorkar laipui chu Manipur-a engmah thleng lo ang maia a awm thu a sawi a ni.