News Lawrkhawm
Republic Day-ah Obama khuallian a ni dawn
January 26-a New Delhi-a Republic Day lawmna-ah US President, Barack Obama chu khuallian a nih dawn avangin December 30 khan Union Home Minister, Rajnath Singh-a hoin sawrkar mi pawimawhten ven himna chungchang an sawiho.
Kunal Ghosh-a'n Mamata puh
West Bengal-a chiahpuam thubuaia t^ng mek, Trinamool Congress MP hlui, Kunal Ghosh-a'n state CM, Mamata Banerjee chu he chiahpuam, Saradha Scam-a inhnamhnawih ngei-ah a puh. CBI Court-in thu a zawhfiahna-ah he thu hi sawiin, Kunal Ghosh hian Railway Minister hlui leh Trinamool Congress party hruaitu hlun Mukul Roy leh Mamata Banerjee chu thawk dunin, Saradha chiahpuam thil hi hai lan a nih loh nan an thuneihna an hmang sual a, chiahpuam sum chhehrelhnaah pawh an tel ngei nia sawiin amah man a nih laia he thila inhnamhnawih man an la ni lo chu a ngaih thiam loh thu a sawi.
Sikh laka pawikhawihtu Rajnath Singh hrem dawn
Union Home Minister, Rajnath Singh-a'n kum 1985-a Sikh ho beihnaa mawhphurtute chu hrem an la ni ngei dawn niin a sawi a, kha thil thleng kha Sikh ho suat tuma pawikhawihna niin a sawi bawk. Union Home Minister hian December 30,2014 khan Delhi-a Tilak Vihar Venga Sikh chhungkaw 17 hnenah, kum 1984-a Sikh ho beihnaa an chhungte thihna avangin chhungkaw 1 zelah zangnadawmna sum Rs. 5,00,000 a sem.
Islamabad High Court-in Rehman Lakhvi bail phal
Kum 2008-a Mumbai-a pawikhawihna-a mawhphurtu bera puh, Lashkar-e-Toiba mi firfiak pawl hotu, Zaki-ur-Rehman Lakhvi chu Pakistan sawrkarin bail a chhuah theih loh turin a ti na a, Islamabad High Court chuan sawrkar thupek hi hnawlin bail-a chhuah a nih tur thu December 29,2014 khan a puang a, sorkar laipui a lungawi lo hle.