Cabinet-in aviation policy thar a pawm

Unon Cabinet meeting chuan hun rei tak lo buaipui tawh, Civil Aviation Policy chu nimin khan a pawm a, thlawhtheihnaa chuan man pawh a ziaawm phah dawn a ni.

Civil Aviation Ministry chuan policy thar hi cabinet pawmpui turin June 3 khan a lo thehlut tawh a ni.

Policy tharah hian khawpui te zawk leh lian zawk inkara darkar khat chhung thlawhna Rs 2,500 leh, minute 30 aia rei lo Rs 1,300 china bithliahna tur pawh a tel. Thlawhtheihna chuan man tlawm zawka siam hi khualzin tam zawk hipna atana tih a ni. Fare tihniam avanga airlines-ten sum an hloh aṭanga 80% chu sorkar laipuiin a pe leh dawn a ni. Ticket cancel-te chu airlin ten ni 15 chhungin an refund fel ngei tur tih a ni bawk.

Khawpui te zawk leh khawpui lian inkarah thlawhtheihna hmanga inkalpawhna tam zawk siam tura rawt a ni a, sorkar chuan domestic sector hnuaiah kum 2022 hian air ticket maktaduai 30 leh 2027-ah maktaduai 50 hralhchhuah theih a in beisei. Interntional flight-ah chuan kum 2027-ah ticket maktaduai 20 hralh theih a tum bawk.

Policy tharah hian airline tharte chu aircraft 20 an neih chuan overseas flight an neih phalsak an ni tawh ang. Tuna policy hman mekah chuan airline-te hian aircraft 20 an neih a ngaih bakah, rampawn lama service tir tur chuan ramchhungah kum nga chhung tal an service phawt a ngai a ni. Hei vang hian he ruahmanna thar hi operator thar, AirAsia leh Air Vistara-ten an chhawr ṭangkai dawn hle a ni.

Civil Aviation Minister Ashok Gajapathi Raju chuan policy thar chuan a ṭha lam zawnga a thlak danglam hle a rin thu a sawi a, India chu kum 2022-ah chuan aviation sector-ah khawvela a lian ber pathumna a ni thei dawn niin a sawi. Domestic sector lamah pawh a ṭhang chak hle a, April thla khan khawvelah 13-na a ni pha tawh a, a
ṭhanna hi 22% zet a tling pha.

Kum 2014-15 chhung khan India hian khualzin, ramchhungah maktaduai 139.92 leh international-ah maktaduai 50 chuang a nei a ni.