University campus-ah politics kaihhnawih thil khuahkhirh rawt

Sorkar laipuiin national education policy thar rawtna siamtu tura committee a din chuan tun hnaia Jawaharlal Nehru University leh Hyderabad Central University-a zirlaiten nawrh an huaihawt avanga buaina a thlen hnuah ramchhunga unversity leh college hrang hrangah politics kaihhnawih thilah khuahkhirhna siam a rawt.

Sorkar laipuiin committee a din hi cabinet secretary hlui, TS R Subramanian-an a ho a, national education policy thar siamna tura rawtna hrang hrang an neihte sorkarah an thehlut a ni.

Committee report-ah hian educational institution-te chu sakhua leh hnam bil behchhana zirlai pawl siamte chu pawmsak lo tur leh, campus-a zirlaite awm theih chin pawh bithliah fel sak tura an duh thu an tarlang.

University campus hrang hrangah zirna pangngai tibuai thei zawnga nawrh huaihawt, punkhawm leh harsatna dang siamte chu pung chho hle niin report chuan a tarlang. Hei vang hian exam hun pawh tikhawtlai a ngaih phah fo a, hetianga harsatna thlentu hi zirlai zingah pawh mi tlemte an ni a, mahse zirlai tam zawkah buaina an thleng thung a ni, a ti.

TSR Subramanian panel-in rawtna a thlen zinga Ṭhenkhatte chu -

1. Campus chhunga politics kaihhnawih thil khuahkhirhna siam

2. Sakhua leh hnam bil zawnga zirlai pawl siam pawmpuina titawp tura ngaihtuah ṭhat

3. Campus-a zirlaite awm theih china khuahkhirhna khauh tak siam. Campus-a buaina thlentu zirlai hi dan pangngai aia university-a zir reite an ni tlangpui.

4. RTE Act hnuaia economically weaker section tana zirna ina seat 25% dahsakah, minority school-te huam tel vek ni rawh se.

5. School tinah yoga inzirtir

6. Class X Board Examination buatsaihah Mathematics leh Science chu level 2-ah ṭhen ni rawh se. Part A (higher or advanced level) leh Part B (basic or lower level)

7. Naupang kum 4-5 inkarte tana pre-school education pek chu an dikna chanvoah dah puan ni rawh se.

8. MDM program chu secondary school zirlaite huam tel tir ni rawh se

10. School education chu Class V thlengin mother tongue emaw, regional language emawin zirtir ni rawh se. Second leh third language thlan tur chu state tin leh tualchhung thuneitute duhthlannaa dah ni rawh se.

11. Higher education-te pualin National Higher Education Promotion and Management Act siam ni rawh se.

12. University vice chancellor ruat chungchangah politics inhnamhnawih lo se.