BJP-in President atan an party mi duh

Kum 2014 Lok Sabha inthlanpuiah central-a sorkarna siam tura hneh taka thlan tlin an nih hnuin, BJP chuan kum 2017-a India President thlan hunah an party mi leh sa ngei dah an duh tih an sawi.

BJP kaihhruai NDA hian Prime Minister Bihari Vajpayee hnuaia sorkar an siam hmasak ṭum khan president thlannaah an party mi thlang tling turin member a ngah zo tawk lo a ni. Eptu party lamin nominee siam tur dan nan, politics lama hnuhma nei lo leh mi hmingṭha, APJ Abdul Kalam a nominate ta a ni.

Mahse tun ṭumah chuan Lok Sabha-a majority a neih phak bakah, Maharashtra, Haryana, Jharkhand, Jammu and Kashmir leh Assam-ahte hnehna a chan leh tak avangin beiseina a nei sang hle. Lok Sabha-ah member 282 a neih bakah, BJP hian president thlannaa vote thlak thei tur, state hrang hrangah MLA 1,126 a nei tawh a ni. Hetihlai hian eptu party lian ber, Congress chuan MP 44 bakah MLA pawh 900 a nei tling pha lo a ni.

President thlanna hi Uttar Pradesh assembly inthlan zawh hnu, nakkum June-July thla velah buatsaih rin a ni. UP inthlanah hian MLA eng emaw zat an neih belh ngei an rin thu an sawi.

President thlang thei turte hi Lok Sabha leh Rajya Sabha member 776 leh MLA 4,120 an ni.