Eptu team-in Kairana tlawh

Uttar Pradesh-a Shaml district-a Kairana khua aṭangin Hindu chhungkaw tam tak an tlanchhia nia sawi chungchang enfiah turin eptu party panga aiawh team chuan nimin khan an tlawh.

Eptu pawlten team an tirh hi JD(U) secretary-general KC Tyagi-an a ho a, CPM aiawhin Mohd Dalim, D Raja (CPI), DP Tripathi (NCP) leh Manoj Jha (RJD)-te an tel bawk.

BJP chuan Muslim tamna khua, Kairana aṭang hian Hindu-te chuan enhran leh tihduhdah an tawh avangin chhungkaw tam tak an tlanchhe tawh niin a sawi. Mahse Uttar Pradesh Chief Minister Akhilesh Yadav chuan hei hi thu dik lo a nih thu sawiin, BJP chu boruak ṭha lo chawh chhuah tumah a puh. Eptu party dangte pawhin BJP thuchhuah chuan Uttar Pradesh khawthlang lama mipuite a tichiai nia sawiin, thil awmdan chu a hmun ngeia kala an enfiah tur thu an sawi a ni.

JD(U) hruaitu Sharad Yadav chuan UP chu assembly inthlan hmabak a nih avangin hei hi remchanga hmanga chi leh sakhaw zawnga buaina thlen tumte laka fimkhur turin mipuite a chah. Yadav chuan, "Kairana khuaa mite ngei pawhin min rawn hmu a, BJP thusawi chu dawt mai a nih thu min hrilh a ni" a ti.

Hetihlai hian state thuneituten Kairana khua aṭanga Hindu mite an tlanchhia nia sawi chungchang chhuichiang tura a hriattir hnuah, district administration team chuan BJP MLA Hukum Singh-an mi 346 an tlanchhia nia a sawi zingah mi pakua chauh chu tlanchhia an ni tih a sawi. Singh-an mi 346 a tihchhuah chu administration team hian uluk taka chhui zuiin, in tinah an kal kual a, list-a chuangte chhungte chu chanchin an zawtchiang a ni.

Administration team chuan list-a hming chuang zinga mi 27-te chu Shamli khuaa cheng an ni a, mi 16-te chu mitthi tawh an ni a, sorkar hna aṭanga pension mi panga hming a tel bawk. List-a chuang zinga a tam zawk hna thawh tur ṭha zawk zawngin hmun dangah an pem chhuak a, heng mite pawh hian an pem chhanah khawchhunga buaina awm vang nia sawi a ni lo bawk.