Pawisa thirah Jamsetji Tata lem dah dawn

Prime Minister Narendra Modi chuan Tata Group dintu Jamsetji Nusserwanji Tata zahna leh chawi­mawi nan pawisa thirah Tata lem dah turin ruahmanna a siam a, a piancham vawi 175-naah hman ṭan turin ruahmanna an siam.

Modi-a auhla pakhat "Make in India" tihhlawhtlinna pakhat atan Prime Minister Office kaihhruaina in, Industry dintu ropui Jamsetji Tata lem hi pawisa thirah chhutkai tum a ni. Tata hi "father of the In­dian Industry' tia hriat anih vang leh ram dangin India an awpbet chung pawha Asia rama steel company dintu hmasa ber anih vangin a ni kher hi thlan chhuah a ni.

Vawiin hian Prime Minister chenna tualah sawmbik mi tlemte te nen pawisa thir tlangzarhna hun hi hman tum a ni a, industry neitute an tel ang. Pawisa thir Rs 5 leh Rs 100 ah Jamsetji Tata lem hi, a awm chin langa nemkai tum a ni a, Kolkata hmuna Security Printing and Minting Corporation of India chuan pawisa thir hi an chh<ng a ni. Tlangzarhna ah hian pawisa thir hi sawmbikte hnenah present a ni ang.

Chawimawina atan India Post chuan stamp ah Jamsetji Tata lem hi an lo dah tawh a. Kum 1985 khan India rama Steel Company in kum 50 a tlin lawmna leh kum 1965-a Industry hmasawnna tura a beih hriatreng nan Stamp-ah an lo nemkai tawh a ni. Zalenna hruai­tute, scientist, hunpui,temples, zirna in hmingthang leh pawl hmingṭha te pualin pawisa thir-ah hian chawimawina lantir a ni tawh ṭhin.

Jamsetji Nusserwanji Tata hi March 3, 1839 khan Navsari ah a lo piang a, Parsi hnam, Zoroastrian puithiam thlah kalzel chhungkua zinga sumdawnna kalpui hmasa ber a ni. Hotel a din a, iron & steel company a din leh a, khawvel huapa zirna in hmingthang leh kawlphetha siam­chhuahna a din bawk.