Thlawhna hruaikawi tum report dawn a ni

Intelligence ten tun hnaia report an dawn dan in Delhi leh Afghanistan khawpui Kabul inkara thlawhna thlawk ṭhin chu firfiakten hruaikawi an tum niin an sawi. Hruaikawi tum nia tarlan zingah hian Air India chu an bitum ber tur niin an sawi. Republic Day hian US President Barack Obama chu khuallian a ni dawn a,hei vang hian venhimna lam hrim hrim ngaihpawimawh thar a nih bakah mipui a tihralkhel avangin thlawhnaah venhimna khauh taka kalpui a ni.

Ramchhunga thlawhna ṭumhmun te chu uluk taka ven nghal vek a ni.

Tunah hian India ramah Afghan National Army te chuan training an nei mek a,ram venhim leh siam ṭhatna atan an thawk nghal ang.

Indira Gandhi International Airport ah venhimna an uluk nghal hle a, thawktute pawh fimkhur tura chah an nih bakah khualzinte bung­rua enfiah uluk turin hrilh an ni.

Thuneitute chuan khualzinte enfiah hna chu thuah thum aia tam an kal­pui a, terminal piahlam thlawhnaa luh dawnah pawh an check leh hial a ni.

Commando te pawh ralthuam famkima inthuamin Thlawhna ṭum­hmun hual velin an duty reng a, thlawhnaa a ruka duty an dah (flight marshal) pawh tihpun a nih bakah thawktute chu harsatna thlen thei thil a awm leh awmloh thlithlai reng turin thurawn pek an ni.

Kum 1999 khan firfiakten India thlawhna IC 814 chu Kandahar ah an hruaikawi tawh a,hetiang deuh chiah hian a thlen leh a rinawm thu intelligence report chuan a tarlang.