International Airport palite ruihhlo tawlhruk 94% kalkawng
India rama International Airport pali Delhi, Mumbai, Chennai leh Kolkata te chu ruihhlo tawlhruk zawng zawng zinga 94% te kalkawng a nih thu, tunhnaia tihchhuah tak Narcotics Control Bureau (NCB) report chuan a tarlang.
Kum 2013 chhung khan ruihhlo man leh chhuhsak 63% chu Thlawhnaah a ni a, 59% te chu khualzinte bungrua leh bungraw thawnkual zing aṭanga man a ni.
Ruihhlo man zawng zawng zinga 6% te chu Guwahati, Bangalore leh Madurai thlawhna ṭumhmunah a ni thung.
Delhi-a Indira Gandhi International Airport-ah ruihhlo man hi ṭum 17 thleng a, Chennai airport-ah ṭum 16, Kolkata leh Mumbai airport-ah ṭum 13 ve ve kum 2013 chhung khan a thleng a ni.
Heng report te hi India rama damdawi leh ruihhlo lama thuneitu sang ber Narcotics Control Bureau (NCB) tarlan a ni a,hetiang lam report thar lam ber a ni.
Guwahati airport-ah kum 2013 chhung khan ṭum hnih chu ruihhlo man a ni a, Bangalore leh Madurai-ah ṭum khat ve ve man a ni. Ruihhlo man te hi Kg 1,026 a ni a- Ketamine, Ganja, Heroin, Ephedrine leh Pseudoephedrine an ni ber. Narcotic Drugs and Psychotropic Substances (NDPS) Act, hnuaiah mi 75 zet ruihhlo kaihhnawih vang hian hren an ni tawh.
" Ruihhlo tawlhrute hi tam tak chu airport-ah danchah leh man an ni a, ram pawn nena inzawmna nei ṭha tak tak te an ni hlawm. India ram aṭanga bungraw thawnchhuah leh ram pawn aṭanga lakluh ah te ruihhlo hi man a ni ber" tih senior anti-narcotics official chuan a sawi.
Ruihhlo lama thuneitu sang ber Narcotics Control Bureau (NCB) te hian airport-ah security force (CISF) te leh Customs duty te chu ruihhlo tawlhruk veng tur hian an pui reng a ni.