Gulberg case : Mi 11 dam chhung tang turin hrem

Special Investigation Team (SIT) court, Ahmedabad chuan nimin khan kum 2002-a Gujarat-a Gulberg Society beihnaa thiam loh chantirte hremna a puang.

Gulberg Society beih a nih ṭum mi 69 thahna thubuaiah hian SIT court hian mi 24 te chu thiam loh a lo chan tir tawh a, an zinga mi 11 chu damchhung tang tura hrem an ni. Mi 12-te chu kum sarih tang tur leh, mi pakhat chu kum 10 tang tura hrem a ni bawk.

Special court judge PB Desai chuan Gulberg beih ni chu ni duhawm lo ber a ni a ti a, mahse prosecutor-ten thiam loh chantirte thi tura hremna pe tura an ngenna erawh a hnawlsak.

Court chuan mi 11-te chu an thih hma loh jail-a tang tura tih an nih thu a sawi a, mahse an hremna hi state sorkar chuan a la tihnep sak thei dawn a ni. Mahse court chuan kum 14 tantir an nih hnuah chauh sorkar chu a thuneihna hmang turin a ngen a, hemi hnua hremna hi a ennawn sak lo a nih chuan an thih thlengin jai-ah hian an tang tur a ni, a ti.

Gulberg Society beih a nih ṭuma mipuiten an tih hlum zinga mi, Congress MP hlui Ahsan Jafri-a nupui, Zakia Jafri chuan court-in thiam loh changte hremna a pek danah a lawm lo tih a sawi. "He thubuai hi ka tan chuan la tawp ve lo a ni. Hei hi rorelna dik a ni thei lo. Ka ukil-te rawnin hma lak zel dan tur kan la ngaihtuah ang" a ti.

Civil rights activist Teesta Setalvad pawhin Gulberg Society beihn thubuai-a court rorel dan chu a chak tawk lo nia a ngaih thu a sawi a, a ni pawhin hremna pek chungchang hi ngaihtuah ṭha turin appeal leh a tum tih a sawi.

Special court Judge PB Desai chuan thi tura hremna pe tura nawrna chu hnialin, "Thil awm dan zawng zawng in en chuan, heng mite hi a hmain pawikhawihna lama inhnamhnawihna record nei an awm lo a ni" a ti. Gulberg society beihnaa inhnamhnawiha puha man zinga 90% chu bail-a chhuatir an lo ni tawh a, heng hunah pawh hian tumahin complaint pawh an thehlut lo a, bail-a chhuahtir an nih lai pawh hian dan palzut zawnga chetna an nei lo niin a sawi.

June 2 khan court hian Gulbarg Society beihnaa inhnamhnawiha puh mi 24-te hi thiam loh a lo chantir tawh a, an zingah hian VHP hruaitu Atul Vaidya pawh a tel. Pawikhawihnaa inhnamhnawihah puh, mi 36-te erawh chu thiam chantir an ni thung.

Kum 2002 khan February 27 khan Ayodya-a biakzina kal, Hindu kar sevak 58-te chu an chuanna, Sabarmati Express-a S-6 pindan chu Godhra rel station-ah hal a nih avangin an thi. He thil thleng hi Muslim-te tih nia puhin, Hindu leh Muslim inkarah intualvuakna nasa tak a thleng zui a ni. Rel-a chuang muslim-te chu himna zawngin Ahmedabad khaw laili laia Gulberb Society hmunah an tlanchhe lut a, hei February 28 khan Hindu ho pungkhawm chuan beiin he society-a in awm tam zawk chu an hal a, mi tam tak an halhlum bawk a ni. He pawikhawihna rapthlak tak thlen lai hian Narendra Modi chu Gujarat chief minister a ni a, a hming pawh a hliau phah hle.

Gulberg Society beihna thubuai ngaihtuah a nih lai hian thuhretu atan mi 338 koh an ni hman a, judge hrang hrang pali kaihhruaina hnuaiah thubuai ngaihtuah a ni hman bawk.