JNU-in zirlaite dilna ngaihtuahtu tur panel din

Delhi High Court-in kumin February 9-a Jawaharlal Nehru campus-a thil thleng kaihhnawiha zirlaite hremna pek a dansak hnuah, University chuan zirlai hrem tawkte ngenna ngaihtuahtu tur member pali awmna committee chu nimin khan a din.

Univeristy thuchhuah chuan, "Vice Chancellor chuan February 9-a campus chhunga thil thleng kaihhnawiha High Level Enquiry Committee (HLEC)-in University dan leh dunte palzuta thiam loh a chantir, zirlaiten an chungthu ngaihtuah nawn tura an ngenna ngaihtuahsak turin committee a din a ni" a ti.

JNU hi February thlaa zirlai ṭhenkhatin Parliament beih vanga thiam loh chantira tihhlum tawh, Afzal Guru-a puala hun an buatsaihah India dodalna thu sawiah puh an nih vangin an buai hle a ni. India dodala puhna thubuaiah hian zirlai pathum man an ni a, an zingah hian JNU Students' Union leader Kanhaiya Kumar pawh a tel a, mahse bail-in chhuahtir mek an ni. HLEC chuan zirlai 21 dangte pawh university rules bawhchhiaa puhin, hremna hrang hrang a pe bawk.

Zirlai hremte hian HLEC thutlukna siam dana lungawi loin ni 16 chhung chaw ngheia nawrh an huaihawt a, mahse university-in hremna a pek hi a hnuhdawh duh loh avangin zirlai ṭhenkhat chu Delhi High Court-ah an zualko ta a ni. Hemi hnu hian High Court chuan zirlaite chu chaw ngheia nawrh huaihawt titawp turin a hriattir a, hei bakah hremna pek an nih chu thuneituten an ngaihtuah ṭhat leh hma chu kaltlangpui rih lo turin a dansak bawk. Hemi hnu hian zirlaite ngenna ngaihtuah tur hian JNU chuan committee hi a din ta a ni.