Sakeibaknei pathum thiam loh chantir

Gujarat-a Gir National Park-a sakeibaknei pathum chu mihring pathum sehhlum thubuaiah thiam loh chantir an ni a, damchhung tang tura hrem an ni.

Park chhungah hian mi pathum sehhlum an nih avangin he park chhunga cheng, Asiatic lion 18-te chu tualthah thubuai siamsak an ni. Forest Department chuan ni 25 chhung thil awmdan a chhui hnuah sakeibaknei pathum-te chuan tualthahnaah hian an inhnamhnawih ngei a ni tiin, thiam loh chantir an ni ta a ni. Heng sakeibaknei pathum - a pa pakhat leh a nupa pahnih-te hi an dam chhungin khar khipna hnuaiah dah an ni ang. Sakeibaknei dang 15-te erawh chu ramhnuaiah chhuah zalen an ni leh dawn a ni.

Thiam loh chantir zinga mi, sakeibaknei pa hi Junagadh bula sahuanah dah a ni ang a, a nu pahnihte erawh chu forest department rescue centre-ah dah an ni thung ang.

Junagadh division-a chief conservator of forest, AP Singh chuan, "A pa hian mihringte hi beiin a sehhlum a, a nu pahnihte hian a mi sehhlumte ruang hi an lo eipui ve bawk a ni" a ti. A nu pahnihte hi mihring tihhlumnaah inrawlh ve lo mah se, mihring sa an tem tawh chuan a hnu zelah mihring tan an hlauhawm tawh dawn avangin khungbeh an ngai tawh niin mithiamte chuan an sawi.

Gujarat-ah hian Asiatic lion hi 400 vel an awma hriat a ni a, heng zinga a tam zawk chu Gir National Park-ah an cheng. Park huam chhungah hian 270 vel an cheng thei a, tam tak chu park pawn lamah an vak chhuak ṭhin a ni.