Punjab CM hlui thattu Thailand-ah man a ni

Punjab Chief Minister hlui, Beant Singh-a thattu, Jagtar Singh 'Tara' chu nimin khan Thailand-ah man a ni.

Tara hi Punjab Police-te thu hrilh bawhzuiin Thailand thu­neitute'n an man a, Pakistan Inter-Services Intelligence (ISI) agency thupek angin mi pakhatin Tara hi awmna tur a lo pe a, he hmun aṭang hian man a ni.

Firfiak pawl, Khalistan Tiger Force-a self-styled commander Jagtar Singh 'Tara' hi kum 1995, August 31-a Chandigarh-a Punjab Secretariat pawna human bomb hmanga rawng taka Beant Singh tihhlum a nihnaa a ruahmantu zing a mi a ni. Hemi ṭuma bomb puak vang hian Beant Singh bakah midang 17 in an nunna an chan an ni.

Hetihlai hian Tara leh tualthattu dang, Paramjit Singh Bheora leh Jagtar Singh Hawara te chu Babbar Khalsa member an ni a, a hnuah Tara hi chhuakin 'Khalistan Tiger Force' a din a ni.

Thihchilh bomb tipuaktu hi Khalistan Liberation Force a mi, Dilawar Singh Jaisinghvala a ni a, a ṭul dan azira bomb dang tipuak tura ruat Balwant Singh Rajoana chu thiam loh chantirin thi turin a chungthu relsak a ni. Mahse Sikh pawl hrang hrangin an dodal vang­in sorkar chuan kum 2012 khan a hremna hi a tihkhawtlai rih a ni.

Kum 2004 khan Tara leh a thurualpuite pahnih bakah Dev Singh-te chu Chandigarh-a Burail jail aṭangin an tlanchhuak a, an tlanchhuahna atan an barrack aṭanga jail pawn lam pawh turin an kut lawngin lei feet 100 zet an verh nia sawi a ni.

Hawara leh Bheora te hi a hnuah Nepal-ah man an ni a, Tara leh Dev Singh-te erawh chu Pakis­tan lamah an lut hman a ni. Hemi hnu hian Tara hi Pakistan passport hmangin Thailand-ah a lut a, Dev Singh hi Pakistan-ah a la awm chhunzawm nia hriat a ni thung.