BBAU in paper hman lohna university hmasa ber nih a tum

Babasaheb Bhimrao Ambedkar University (BBAU) chuan ramchhunga paper hman lohna university hmasa ber nih tumin hma a la dawn a, hna leh database tam zawk chu online format in a kalpui tawh a ni.

Central University Vice Chancellor RC Sobti chuan, "Ramchhung university zinga paper hmang lo hmasa ber nih kan tum a ni," a ti a, hemi atan hian hma la ṭan tawhin an thil tum hi kum hnih chhunga an puitlin theih a beisei thu a sawi. Hei hi an tihpuitlin hunah chuan zirlaite'n migration leh provisional certificate an lakna kawnga harsatna an tawh ṭhin pawh a ziaawm phah dawn a, mark sheet te pawh online hmanga pek an ni dawn a ni, a ti.

VC chuan an project thar hi an university sum hmanga an kalpui tur thu a sawi a, hemi rual hian UCG pawhin a theih angin a pui dawn niin a sawi. "Smart classroom te pawh siam niin, lecture pawh e-content leh audio-visual hmanga neih a ni ang, campus chhungah Wi-Fi facility pek a ni bawk ang," tiin Sobti chuan a sawi.

System tharah hian zirlaite chanchin hriattirna chu thla tinin an nu leh pate hnenah thawn ṭhin a ni bawk ang.