Trade Union-te'n ni nga awh nawrh an huaihawt

Trade Union chuan nimin aṭang khan coal industry strike, ni nga awh an huaihawt ṭan a, hei hi kum 1977 hnua industrial strike lian bera ngaih a ni.

Union chuan State-run Coal India siamṭhat a nih dan duh loin nawrh hi an huaihawt a, hei vang hian ram chhunga coal, ni khatah ton maktaduai 1.5 siamchhuah ṭhin chu a nghawng buai dawn bakah power plant lam pawhin fuel lamah harsatna an tawh phah rin a ni.

All India Coal Workers Federation hruaitu, Jibon Roy chuan thu­chhuah siamin, an nawrh huaihawt chu hnathawktu nuai sarih velin an zawm niin a sawi. Nimin vek khan sorkar chuan trade union lian zual- BMS, INTUC, AITUC, CITY leh HMS hruaitute chu an harsatna chinfel dan ngaihtuah turin meeting a neihpui nghal bawk.

Coal India chairman atana ruat thar, Sutirtha Bhattacharya chuan, "Boruak ṭha tak hnuaiah kan buainate hi chinfel theih a nih ngei kan beisei a ni. He nawrh huaihawt­in nghawng a neih dan chu nakinah a la hriat dawn a, tuna lo sawi lawk vak theih a ni lo," a ti.