Hindu hmeichhiate'n Fa pali tal an nei tur a ni : Sakshi Maharaj

Parliament in hnihah sakhaw dang aṭanga Hindu-a inleh luihtir chung­changah rorellai, BJP-in beih a tawh mek laiin, Uttar Pradesh-a Unnao bial BJP MP Sakshi Maharaj chuan inhnialna dang chawktho turin Hindu hmeichhiate chuan a tlem berah fa pali tal an neih a ṭul thu a sawichhuak leh.

Thawhlehnia Meerut-a Sant Samaagam Mahotsava neihnaah, Maharaj chuan thu sawiin, "Tunah chuan nupui pali nei a, fa sawmli neih angte kha India ramah a kalpui theih tawh loh a, mahse Hindu sakhaw chawinun leh humhalh a nih chhunzawm zel theihna turin Hindu hmeichhiate chuan a tlem berah fa pali tal an neih a ngai tawh a ni," a ti.

Sakshi Maharaj chuan sakhua inleh luihtir thlentute chu thi tura hremna thlenga pek an ni tur a ni a ti a, hemirual hian mahni sakhua hluia kirte chu inlehtir nen a in ang lo a ni, a ti. "Han nghak leh hrih ila, Parliament-ah bawng talhtute leh sakhua inleh luihtirtute thi tura hremna dan chu pass a la ni thuai ang," tiin a sawi.

Ayodhya-a Ram mandir din tum chu khawvela eng thil mahin a dang thei dawn lo tih sawiin, Maharaja chuan eng kawng pawhin mandir hi din a ni dawn a ni, a ti.

BJP peng pawimawh, Rashtriya Swayamsewak Sangh (RSS) hotu Moham Bhagwat pawhin kar kalta khan 'India hi Hindu ram a ni' tiin a lo sawi tawh bawk. Hemi hma hian union minister Niranjan Jyoti chuan mipui hmaah sakhaw tlem zawkte chungchangah ṭawngkam mawi lo tak a lo hmang tawh bawk a, a thusawi avang hian Parliament-ah pawh thupha a chawi phah hial a ni.