Sunanda Pushkar thihdan chhui turin SIT din a ni

Delhi Police chuan Union Minister hlui, Shashi Tharoor-a nupui, Sunanda Puhskar thih dan chhui ṭha turin Special Investigation Team (SIT) a din.

City Police Commissioner BS Bassi chuan nimina chanchin thar lakhawmtute a kawmnaah, mak taka nikum January 17-a Sunanda thih dan chungchangah hian IPC Section 302 hnuaiah tualthah thubuai an ziak lut tih a sawi. Sundanda hi hotel-a an roomah thia hmuh a ni a, mahse Bassi chuan midang thah ngei nia a lan thu a sawi.

SIT thil chhui hi DCP South chuan hoin, a enpui reng ang a, Additional DCO South bakah inspector leh SHO-te'n an pui bawk ang. Bassi chuan SIT-in a ṭul angin hma a la zel dawn tih sawiin, Sunanda pasal Shashi Tharoor chu thu zawhfiah a nih dawn leh dawn loh erawh a sawichiang duh rih lo.

Delhi Police official-te chuan nikum December 2 khan Thiruvananthapuram-a Kerala Institute of Medical Sciences (KIMS) doctor-te hmuin, Sunanda medical record-te an dil a ni. Sunanda hi 2014, January 12-14 khan KIMS ah hian enkawl a ni a, mahse KIMS doctor-te hian Sunanda hian thihpuina tur khawp ṭhat lohna a nei lo niin an sawi.

Shashi Tharoor chuan KIMS-a a nupui a awm lai hian a ṭha lo hle a, enkawlna pawh an dawng nasa niin a sawi thung.

Bassi chuan AIIMS aṭanga medical report an hmuhah Sunanda hi tûr vanga thi nia tarlan a nih thu a sawi. Police-te chuan Sundanda puma an thil hmuh sample chu rampawn lam laboratory-ah thawn an tum a, heta ṭang hian a thih chhan dik tak an hriat theih an beisei. Sample hi UK emaw US emaw ah thawn an tum niin an sawi. Police-te chuan Sunanda thih chhan hi radioactive isotope, Polonium 210 vang niin an ring a, mahse he tûr enfiahna hi Indian rama laboratory-ahte a awm lo a ni.