Education policy thar state tin sawipui dawn

Human Resource Development ministry chuan national education policy thar siam dan tur chungchangah thla thar hian state hrang hrangte a berawn dawn a, state sorkar te ngaihdan bakah zirlai, nu leh pa ngaihdante pawh a la tel bawk ang.

HRD Minister Smriti Irani chuan New Delhi-a state education minister conference a hmanpuinaah he thu hi sawiin, state tinte chu academic session thar aṭangin system pahnih- 'choice-based credit transfer system' leh 'credit framework for skills' hmang turin a ngen a, state sorkar chu vice chancellor te leh principal te hemi chungchang hi sawipui a, VC kaihhruaina tur siam tura UGC ngen turin a ti bawk.

'Choice-based credit transfer' system hmang hian zirlaite chuan an course duh an thlang thei ang a, a zirdan kalphung pawh an duh anga kalpuiin, additional course an la bawk ang. 'Credit framework for skills' hmangin vocational education, skill, education leh job market lamah kawng hawnsak an ni bawk ang.

Education policy thar chungchangah thla thar hian state education minister-te chu workshop neihpui an ni dawn tih minister chuan a sawi.

Smriti Irani chuan state minister-te hmaah hian kum 15 dawn liamtaah khan Mumbai-a hotel pakhatah thleng sila a inhlawhfak ṭhin thu sawiin, minister a nih hnuah pawh hotel-a thleng sila a lo inhlawh tawhnate chuan amahah insitna engmah a siam lo tih a sawi. "Eng hna pawh hi thawk ila zahpuiawm a awm lo a ni," a ti.