Tamil Nadu-in criminal law thar siamṭhat a tum

Tamil Nadu sorkar chuan criminal law thar pathumte chu zirchiang a, an state law and order nena inmil tura siamṭhat dan ngaihtuah turin committee a din.

IPC, CrPC leh Evidence Act thlaktu, Bharatiya Nyaya Sanhita, Bharatiya Nagarik Suraksha Sanhita leh Bharatiya Sakshya Adhiniyam-te chu July 1 aṭang khan ram pumah hman ṭan an ni.

Tamil Nadu sorkar hian criminal law pathum siam tharte hi a hma aṭangin a lo sawisel tawh a, section ṭhenkhatah thil fel tawk lo a awm niin a ngai. Nikum December thlaa parliament-a pass a nih pawh khan na takin a sawisel a, he dan thar siam tur chungchangah state sorkar zawng zawng biak rawn an ni lo tih a sawi. Hman ṭan a nih hma, June 17 pawh khan chief minister MK Stalin chuan union home minister Amit Shah hnenah lehkha thawnin, siamṭhat ngai a awm thute a hrilh bawk.

Hei bakah state sorkar hian criminal law thar hming hi a sawisel bawk. Dan thar hming hi Sanskrit niin, hei hi mi nawlpui, he dan hmangtu turte tana thil sawi awlsam tak a ni dawn lo a ni, a ti.

Chief minister MK Statlin hoa state Home leh Law department-ten high-level consultative meeting an neihah,an state pual bika criminal law siamṭhat tur chungchang hi an ngaihtuah a ni. Hemi lo buaipui tur hian one-member committee, High Court judge hlui, M Satyanarayanan an ruat nghal a, thla khat chhunga report thehlut turin an ti a ni.

P Chidambaram-a'n TN sorkar a thlawp

Congress party hruaitu leh union minister hlui, P Chidambaram chuan Tamil Nadu-in criminal law thar pathum, an state dan leh thupek mila siamṭhat dan tur ngaihtuah tura committee a din chu a thlawp thu a sawi. Criminal law chu concurrent list subject a ni a, state legisture chuan an duh angin an siamrem thei a ni, a ti.

Tamil Nadu-in committee atana ruat, Justice (retd) Mr K.Sathyanarayanan chu stakeholder zawng zawng - judge, lawyer, police, law teacher, scholar leh human rights activist-te pawh berawn vek turin a chah.