India-in Russia-ah Consulate 2 a hawng dawn : PM Modi

Russia rama cham mek, prime minister Narendra Modi chuan India chuan Russia-a khawpui pahnih, Kazan leh Yekaterinburg ah consulate thar a hawng dawn tih a sawi. India hian St Petersburg leh Vladivostok-ahte consulate hi a nei sa tawh bawk a ni.

Moscow-a India mite nena inkawm hona a neihah PM Modi hian consulate pahnih hawn belh a nih tur thu hi a puang a, hei hi Russia rama zin duhte leh insumdawn tawnna lam atan pawha thil ṭangkai tur a nih thu a sawi. Modi chuan India-Russia inlaichinna chu inrintawnna aṭanga siam niin a nghet hle tih a sawi a, ram pahnihte inlaichinna hian fiahna pawh an tawk fo a, mahse a hma aia nghet leh chak zawkin inzawmna hi an nei zel zawk tih a sawi. Russia president Vladimir Putin pawh fakin, a kaihhruaina hnuaihah kum 20 chuang ram pahnihten inlaichinna nghet an nei chho zel a ni, a ti. Prime Minister a nihna anga Russia a tlawh ṭum rukna niin, Putin nen meeting an neih vawi 17-na a nih thu a sawi.

Yekaterinburg hi Russia rama khawpui lian palina niin, economic center pawimawh a ni. He khawpui hian Fifa World Cup 2018-ah khan match pali a lo thleng tawh a ni. Kazan hi Volga leh Kanzaka lui bula awm niin, cultural leh educational hub a ni a, economy centre a ni chho mek bawk. October thla hian he khawpui hian BRICS Summit a thleng dawn a ni.

PM Modi hian nimin khan Russia aṭangin Austria a pan leh a, kum 40 chuang hnua India Prime Minister-in a tlawhna hmasa ber tur a ni. Austria-ah hian ni hnih a cham ang.