Ukraine President-in Modi leh Putin meeting a sawisel

Ukraine president Volodymyr Zelenskyy chuan prime minister Narendar Modi-a'n Russia ram a tlawh leh, Russia president Vladimir Putin nena meeting an nei chu na takin a sawisel a, remna leh muanna siam tura hmalakna tichhe thei niin a sawi.

PM Modi hian ni hnih cham turin Thawhṭanni khan Russia hi a thleng a, Russia President Putin nen Moscow khaw daia Novo-Ogarevo-a Presidential official residence-ah meeting an nei nghal a ni. Modi hian kum 2022, February thlaa Russia-in Ukraine a run hnua Russia a tlawhna hmasa ber a ni.

Ukraine President chu Russia-Ukraine indona thlen mek laia Modi-a'n Russia a tlawh hian a tilawm lo hle. "Khawvela democracy ram lian ber hotuin Moscow khawpuiah ngei khawvela pawi khawihtu lian ber a kuah thei hian mi ti lawm lo hle a, remna leh muanna atana hmalakna tichhe thei a ni," a ti. Modi-a'n Russia a thlen hnuah hian, Russia missile chuan Ukraine khawpui, Kyiv-a naupang hospital kap fuhin, mi 24 an thi a, chhiatna nasa tak a thlen bawk. Russia-in Ukraine a run chungchangah India hian Russia demna thu a la ti chhuak lo a, buaina awm mek chu inbiakna hmanga chinfel theih a nih thu a sawi a ni. Indona a thlen hnuah pawh Modi hian Putin leh Ukraine President-te hi ṭum eng emaw zat telephone-in a be tawh bawk.