Jail-ah Lakhvi táng chhunzawm dawn

Kum 2008-a Pakistan fir­fiakte'n Mumbai khawpui an beihna tura ruahmantu zing a mi, Zaki-ur-Rehman Lakhvi bail-a chhuah phalsakna chu Pakistan Supreme Court chuan a hnawlsak.

Kum 2014 December 18 khan Anti-Terrorism Court chuan Lakhvi hi bail-a chhuah a lo phalsak tawh a, mahse bail-a chhuah a ni tukah hian Maintenance of Public Order (MPO) hnuaiah man leh nghal a ni. Mahse hemi hnu hian Islamabad High Court chuan MPO hnuaia Lakhvi hrenna hi a titawp a, hei hi India chuan na takin a sawisel a, external ministry chuan Pakistan high commissioner Abdul Basit chu koin, high court thutlukna siam chungchangah a lungawi loh thu pawh a lo thlen tawh a ni.

Pakistan Supreme Court chuan Lakhvi-a bail-a chhuah phalna hi hmanhmawh taka siam a ni tiin a hnawlsak a, hemi chung­chang hi Islamabad High Court-ah ngaihtuah tura tiin, hun thawl tak hnuaiah Lakhvi leh sorkar lam aiawhte thu pawh a ngaihtuah tur a ni, a ti. Hemi chung­chang hi karleh Thawhṭanni hian ngaihtuah leh a ni ang.

Kum 2008 December thla khan Mumbai khawpui beih kaihhnawihah Lakhvi hi a thurual­pui nia puh midang parukte nen man an ni a, Adiala Prison-ah an tang mek a ni. Kum 2009, November 25 khan thubuai siamsak an ni.

Mumbai khawpui beihnaah hian mi 166 an thi a, midang eng emaw zatin hliam an tuar bawk. He pawikhawihna thleng vang hian India leh Pakistan inkar bo­ruak pawh a chhiat phah hle a ni.