India ramah Covid-19 kai Nuai 30 chuang tawh

Ministry of Health and Family Welfare-in nimina report a tihchhuahah hri kai hmuh chhuah thar 69,239 an awm leh a, hei nen hian India ramah nimin thleng khan hri kai chhinchhiah 30,44,940 an awm tawh.

Darkar 24 chhungin dama puan 57,989 awm lehin hri kai dam leh hi 22,80,566 lai an awm tawh a, hri kai mek 7,07,668 an awm bawk. Mi 912 lai thihpui an awm leh avangin hri vanga thi mi 56,706 an awm tawh a ni.

India ramah hian hri hi nasa takin leng mah se enkawl dam an tam tawh avagin dam leh rate pawh hi a sang hle a, 74.9% lai chu dam leh tawhin thihpui rate chu 1.86% a ni thung.

Indian Council of Medical Research (ICMR) chuan nimin khan dakar 24 chhungin Covid-19 sample 8,01,147 an endik tih an tarlang a, hei nen hian hri len ṭantirh aṭanga nimin thleng khan sample 3,52,92,220 an endik tawh a ni. Hri endikna atana laboratory pawm­pui pawh an neih belh zel a, nimin thleng khan 1515 lai an pawmpui tawh a, heng zinga 983 hi sorkar laboratory niin 532 chu private laboratory a ni bawk. 

India hi Khawvel ram hrang hrang zinga hri kai tam pathumna a ni a, Brazil leh US chiah a pha lo. Tun ang renga hri kai an pung zel a nih chuan Brazil ai hian hri kai an tam thuai dawn niin a lang.

Ni 206 chhungin India ramah hian hri kai nuai 30 an chuang hman a, ni 16 liam taah kha chuan nuai 20 vel an awm a, hri kai hi an pung chak hle a ni.

Ni 18 lai chu ni khata hri kai hmuh chhuah thar tam ber tam kan ni tawh. Ni khata sample endik zat pawh a tam ṭhin hle a, Zirtawpni liam ta khan ni khatah ICMR chuan sample 10,23,836 an endik a, hei hi ni khata an endik tam ber ṭum a ni nghe nghe.