Foreign Secretary-in China a tlawh

Foreign Secretary S Jaishankhar chuan India-in Nuclear Supplier Group (NSG) member nih a dil chungchangah an thlawpna zawngin kar kalta khan China a tlawh. China-a a zin chungchang hi puanzar lawk a ni lo.

NSG hi khawvel huapa nuclear techology lama sumdawnna lama thuneitu a ni a, he pawl member-ah hian India hi a awm a nih chuan India ram chhunga nuclear energy programme chu international market lamah phochhuah an ni ve thei dawn a ni. India hian NSG member nih tum hian hun rei tak a bei tawh a, May 12 khan dilna pawh a lo thehlut tawh a ni.

Ministry of External Affairs thupuangtu, Vikas Swarup chuan foreign secretary hian June 16-17 khan China a tlawh ngei tih sawiin, China ram hruaitite pawh a kawm a, thil hrang hrang a sawipui zingah NSG member dilna chungchang pawh hi a sawipui nghal a ni, a ti.

Jaishankhar hian NGC member nih dilna chungchang China a sawipu ṭum hnihna a ni a, May thlaa President Pranab Mukherjee-an China a tlawh ṭuma a ṭawiawm khan a lo sawipui tawh bawk a ni.

India-in NSG member nih a dilna hi member ram eng emaw zat chuan an thlawp tur thu an lo sawi tawh a, an zingah hian US, Britain, Italy, Mexico leh Switzerland pawh an tel a, China hi a dodaltu lian tak a ni ṭhin thung. Turkey, South Africa, Ireland leh New Zealand ramte pawhin India-in member nih a dilna hi an thlawp lo bawk.

China chuan India hi Nuclear Non-Proliferation Treaty (NPT) zawmtu a nih ve loh avangin NSG member-a dah hi a remti lo a, NSG member ramte pawh India dilna chungchangah hian a ngaihdan a phir hle niin a sawi. India member dilna chu phalsak a nih chuan Pakistan pawh member a nih phalsak a ni tur a ni, a ti.

June 24 hian NSG plenary meeting chu Seoul-ah neih a ni dawn a, he hunah hian India-in member nih ve a dilna hi ngaihtuah a ni ang.