Kumin kum tawp lamah Covid-19 vaccine peihfel hman tum

Union health minister Dr Harsh Vardhan chuan kar liam ta Inrinni khan India siam Covid-19 vaccine chu kumin kum tawpah hian peihfel hman tum a nih thu a sawi.

Tunah hian vaccine hi clini­cal trial-a phase thumnaah en­chhinna neih pui mek a ni a, phase khat leh hnihna chu zawh a nih tawh avangin kumin kum tawp hian vaccine hi peihfel hman ngei an nih a rin thu Ghaziabad, Uttar Pradesh-a makeshift hospital a hawnnaah a sawi. 

"Thla riat vel hri kan do ta, hri hi darh zel mah se kan ramah chuan enkawl dam an tam tawh hle a, recovery rate pawh hi 74% hial a tling tawh a ni. India rama Covid-19 hri kai enkawl dam tawh hi mi nuai 22 chuang an awm tawh a, hri la kai mek mi nuai 7-te hi an dam leh vat ka beisei a ni," tiin Vardhan chuan a sawi bawk.

Vardhan chuan "A tirah chuan hri kai test-na hi Pune-ah chiah kan nei a, tunah chuan hmun hrang hrangah test theih a ni tawh. Vawiinah chuan test theihna lab hi 1,500 chuang awm tawh a, kar liam ta Zirtawpni te phei kha chuan mi nuai khat vel kan test thei hial a ni," a ti.