Kailash-a'n ram tan a Nobel medal a hlan

Khawvel chawimawina sang leh ngaihhlut, Nobel Peace Prize dawngtu Kailash Satgyarthi chuan a chawimawina dawn chu India ram tan a hlan thu sawiin, a medal chu President Pranab Mukherjee hnenah a pe.

Satyarthi hian Nilaini khan Rashtrapati Bhavan-ah President Mukherjee hi hmuin, a medal hi a hlan a ni. Satyarthi hi Pakistan tleirawl, Malala Yousafzai nen 2014 Nobel Peace Prize hlan an ni.

President chuan Satyarthi-a'n a Nobel Prize medal a hlan chu lawm­awm a tih thu sawiin, Rahstrapati Bhavan Museum-ah pholan a ni dawn tih a sawi, museum hi mipuite en theih turin kar khatah ni thum hawn a ni. Dr CV Raman pawhin a Nobel Prize chu ram tan a lo hlan tawh thu President chuan sawichhuakin, India mi Nobel Prize dawng tawh dangte erawh chuan an medal-te chu anmahniin an kawl ṭhin niin a sawi.

Midangte tana malsawmna ni tura Satyarthi-a hnathawhte chu fakin, President chuan a hna chu theihtawp chhuaha thawk chhunzawm zel turin a fuih nghal bawk.

Satyarthi chuan, "Kan ram, kan culture leh mipuite hi ka chhuang em em a, ka nuna hlawkna ka hmuh zawng zawngte hi India aṭang vekin a ni. India rama piang zingah Nobel Peace Prize dawng hmasa ber ka ni a, he chawimawina hi kan ram tan ka hlan a ni," a ti.

Nobel Peace Prize-in a ken tel pawisa pawh naupangte tana a hlan vek tur thu sawiin, Satyarthi chuan, "Pawisa te chu a vaiin kan rama naupangte dinhmun siamṭhatna tura beihna atan hman a ni ang. Kan organization emaw, keima pualin emaw hman ka tum lo a, organization dang kaltlangin naupangte tan ka hlan dawn a ni," tiin a sawi. Nobel Peace Prize hian tangka fai, dollar maktaduai 1.1 a keng tel a, hei hi chawimawina dawngtu dang, Malala Yousafzai nen an insem a ni.

Bachpan Bachao Andolan (save childhood movement) dintu, Kailash Satyarthi hi Taiwan sorkar chuan an rama zin turin a sawm a, January 14-18 hian a nupui nen an kal dawn a ni. A cham chhungin Satyarthi hian Taiwan President Ma Ying-jeou hmuin, Chang Yung-fa Foundation-ah thu a sawi nghal dawn a, National Tsing Hua University-ah zirlaite hmaah thu a sawi bawk ang.