Hruaitu ṭhenkhat thusawiin BJP a tihmingchhia : Amit Shah

Bharatiya Janata Party (BJP) president Amit Shah chuan sakhaw inlehtir chungchanga an an party hruaitu ṭhenkhatte thusawi chuan an party hmel a tichhia tih a sawi.

Nimina Hyderabad-a news conference a neihah, Amit Shah chuan, "Kan party MLA leh MP ṭhenkhatte thusawi hian BJP hming a tichhe ṭhin a ni," tiin, sakhua inlehtir chungchanga an ṭawng danah an party hruaitute chu fimkhur turin vawi tam tak a lo chah tawh tih a sawi bawk.

BJP MP Sakshi Maharaj-a'n Hindu hmeichhiate fa pali nei vek tura a tih chungchang chu chhangin, Shah chuan hei hi a mimal ngaihdan a ni a, BJP chuan a pawmpui lo tih a sawi. Sakshi-a thusawi hian sor­karin hmasawnna tura hna a thawhna kawngah nghawng engmah a neih loh tur thu a sawi.

Hetihlai hian Sakshi chuan a thusawiah thil dik lo a awm a nih chuan khaihlum hial a inhuam thu a sawi. Nimina interview a neihnaah, Maharaj chuan, "Media lam hian ka thusawi chungchang hi tihpunlun an tum a ni. Hemi chungchang hi a hma pawhin ka lo sawi fo tawh a, tun ṭuma ka sawi hmun pawh hi political stage a ni lo. Ka thusawi avanga rilru na tak tak an lo awm a nih chuan, fa pa­hnih pathum aia tam neite hremna dan siam a ni mai tur a ni," a ti. Mi zawng zawng chu angkhat vek an ni tiin, thil ṭha tak an sawi chu media lamin an vawrh lar leh duh si lo, tiin a sawi.