Sunanda thih chungchangah a pasal notice pek a ni lo

Delhi Police Commissioner BS Bassi chuan Congress MP, Shashi Tharoor chu a nupui, Sunanda Pushkar thih dan chhuinaah police-te thawhpui tura hriattirna pek a ni lo tih a sawi. Mahse Tharoor hian police-te chu an thil chhuinaah a theih anga a thawhpui tur thu leh, an thil hriat duhte pawh hrilh tura a inpeih reng thu a sawi.

Bassi chuan, "Shashi Tharoor hnena notice pe anga thuthang awm chu thu dik lo a ni a, engmah hriattirna pek a la ni lo," a ti.

Investigating officer-te chuan thil pawimawh nia hriatte an lakhawm mek tih sawiin, Bassi chuan Tharoor hi thu zawhfiah a nih dawn leh dawn loh chu an la ngaihtuah dawn chauh niin a sawi.

Shashi Tharoor hi Kerala-a ayurvedic clinic-ah a hnungzang na avangin enkawl mek a ni a, vawiin hian a chhuah theih beisei a ni.

Sunanda thih dan chhuitu, Delhi Police-te chuan Shashi Tharoor hi a nupui nena an inlai­chinna kaihhnawih thilah thu an zawhfiah ngei rin a ni a, Sundanda leh Pakistan journalist Mehr Trar intihbuai dan te leh Mehr nena inlaichinna an neih dante pawh zawh a ni ang. Hei bakah hian Sunanda taksaa hliam leh duk, hmun 15 laia hmuh chungchang te, a medical history leh a damdawi ei ṭhin te pawh an zawt­chiang ang.