A hun takah Bihar inthlan neih a ni ang: EC
Bihar assembly inthlan neih tur chu Covid-19 leng mek avangin sawn hla turin political party hrang hrangin ngen mah se, Election Commission lam chuan inthlan hi a hun takah neih a ni dawn tih a sawi.
Member 243 awmna Bihar Legislative Assembly term hi November 29 hian a tawp dawn a ni. Assembly inthlan hi October - November hian buatsaih a nih rin a ni.
Eptu party hrang hrangte chuan inthlan hun sawn tur hian an phut a, hemi rual hian hri leng kara inthlan kalpui tlang a nih chuan mipuite himna tura rawtna hrang hrangte an thehlut nghal bawk. EC chuan hripui leng vangin election leh bye-election neih tura atan inkaihhruaina a siam thar chu a tichhuak. Kaihhruaina a siamah hian voter-te chu electronic voting machine (EVM) button an hmeh dawn avangi kutkawr pek vek tura tih a ni. Polling station-te chu inthlan hma niin sanitize vek tur a ni a, polling station entry point tinah thermal scanner dah tura tih a ni bawk. EC chuan inthlanah hian Covid-19 kai, khung hran mekte pawh midang vote an thlak zawh vek hnuah, health lam thuneitute enpuina hnuaiah vote an thlak a phalsak bawk.