Congress hruaituten Sonia Gandhi hnenah ngenna thlen

Congress party hruaitu 29 chuang chuan an party president lailawk ni mek, Sonia Gandhi hnenah nimin khan ngenna thlenin, party president nghet ni chhunzawm turin an ngen. 

Vawiin hian party thuneitu sang ber Congress Working Committee meeting chu neih a ni dawn a, he hunah hian hun rei tak party president nghet nei loa an awm tawh chu an tihfel rin a ni. 

Nikuma Lok Sabha inthlanpuia an Congress party an chet ṭhat tawk loh avanga mawhphurhna la a, party president aṭanga Rahul Gandhi a ban hnuah a thlaktu tur hi ruat a la ni lo, Sonia Gandhi chu president lailawk atan ruat niin, tun thlengin president tur hi tihfel a ni lo. 

Kum 73 mi, Sonia Gandhi hi hruaitu eng emaw zatin party president leh turin duh mah se, amah hian a hriselna ṭhat tawk loh avangin a lo hnial tawh a ni. Hetih lai hian hruaitu tam zawk chuan Rahul Gandhi dah leh an duh a, mahse politics lama tawnhriat a la nei tam tawk lo nia sawia party president atan duh lo pawh an awm tho bawk.