Caretaker CM a nihna aṭangin Omar-a bang dawn

Jammu and Kashmir-a sorkar thar siam tur chu tun thlengin tihfel a ni lo a, caretaker Chief Minister chelh mektu, Omar Abdullah chuan Pakistan nena an inri-na boruak ṭha lo avangin full time administrator an mamawh tawh a ni tiin, caretaker CM a nihna aṭanga ban a tum.

Nilani zan khan Omar hian state Governor NN Vohra chu Delhi-ah a hmu a, sorkar thar a din hmaa caretaker CM dinhmun chelh tura dah a nihna chu hlihsak turin a ngen a ni.

Kum 2014 December thlaa assemby inthlan an neihah khan Omar Abdullah-a party, National Conference (NC) hi a chak zo lo a, hei vang hian December 24 khan CM a nihna aṭangin banna a thehlut a ni. Mahse Governor hian sorkar thar a din hma chu caretaker CM hna chelh rih tura a lo ngen avangin a chelh chhunzawm a ni.

Omar chuan sorkar thar siam hna hi ni 10 emaw, kar khat chhung emawa tihfel theih tura sawi ni mah se, tun thlengin tihfel a la ni lo a ni, a ti.

"Pakistan nena kan inri-naa boruak ṭha lo thleng vangin ramri bula cheng mi 10,000 chuang chu an tlanchhia a, tuilian rapthlak tak tuartute chhawmdawl hna thawh chhunzawm reng a la ngai bawk a, hei vang hian kan state hian cartaker ringawt ni lo, full time administrator a mamawh tawh a ni," tiin Omar chuan a sawi.

MLA 28 neitu, PDP chu NC leh Congress-in thlawp an tum thu an sawi hnua central rule puang tura rawtna a la awm chu sawifiah turin a phut bawk. Member 87 awmna, Jammu and Kashmir Assembly-ahhian PDP hian MLA 28 neiin, BJP in 25, NC-in 15 leh Congress in MLA 12 an nei a ni. BJP hian sorkar siam tumin NC leh PDP hi a be mek a, mahse inremna an siam thei lo a ni.

January 19 hian sorkar thar hi lakluh a ngai tawh dawn a, hemi hmaa siamfel hman a nih loh chuan Governor rule puan a ngai dawn a ni.

Hetihlai hian BJP President Amit Shah chuan J&K-ah hian BJP kaihhruai sorkar a din theihna atan an bei mek tih sawiin, "Thutlukna la siam thei lo mah ila, inremna hi siam thuai a nih kan beisei," a ti. Inbiakna a neihpui mek, PDP chuan BJP nen an thawkdun dawn a nih chuan Common Minimum Programme (CMP) behchhana kalpui a ni tur a ni, a ti. Thawhdunna tura an rawtna angte hi BJP hi a remtihpui theih loh chuan inthlan ṭhat hmachhawn leh mai pawh an duh zawk niin an sawi.

Kum 12 kalta khan J&K hian hetiang dinhmun hi a lo hma­chhawn tawh a, PDP leh Congress party-te'n ṭangrual sorkar siam tuma an inbiakna an tihfel theih mai loh avangin Farooq Abdullah chuan governor hnenah cartaker CM a nihna chu hlihsak turin a lo ngen tawh bawk a ni.