India ramah raltlan 2,00,000 an awm : UNHCR

U.N. Refugee Agency (UNHCR) chuan Mid-Year Trends 2014 report a tihchhuahah, kum 2014 kum chanve hmalam khan India ramah raltlan 2,00,000 chuang an awm niin a tarlang.

Kum 2014 chhung khan khawvel pumah tualchhung indona leh tharum thawhna thleng vanga raltlan mi maktaduai 5.5 vel an awm a, heng zinga a tam zawk chu Middle East leh Africa mite an ni.

UNHCR chuan raltlan zinga a tam zawk hi anmahni ramchhungah an tlanchhia a, mi maktaduai 1.4 vel chu international border kanin ramdangah an tlanchhia niin a sawi.

2014 kum laihawl thlenga UNHCR ṭanpuina dawngtu zat chu mi maktaduai 46.3 an tling a, hei hi kum 2013 kum tawp lam a mi aiin maktaduai 3.4 in an tam zawk a ni.

Raltlan zingah hian Syria mi an tam ber a, mi maktaduai 3 vel an tling a, hei hi UNHCR-in khawvel puma raltlan a ṭanpui zinga 23% an tling pha a ni. Somalia-ah raltlan maktaduai 1.1, Sudan-ah 6,70,000, South Sudan-ah 5,09,000, Democratic Republic of Congo-ah 4,93,000, Myanmar-ah 4,80,000 leh Iraq-ah raltlan 4,26,000 an awm.