Rajnath-a'n Punjab dilna a hnawl

Union Home Ministry chuan Punjab Chief Minister hlui Beant Singh-a thahna kaihhnawiha thiam loh chantirte chhuah hma tura ngenna a hnawl a, hemirual hian hemi chungchanga Punjab sorkar rawtna siam dangte chu enfiah a remti.

Punjab Deputy Chief Minister Sukhbir Singh Badal leh Shiromani Gurdwara Parbandhak Committee president Avtar Singh Makkar-te chuan Ningani khan Home Minister Rajnath Singh an hmu a, tang chhuah hma tura an ngente hming list an pe.

Meeting zawh hnua chanchin thar lakhawmtute a kawmnaah, Badal chuan Home Minister hian list hi lo enfiah a, an rawtna siamte pawh dan anga taka lo zirchian a tum thu a hrilh niin a sawi.

Badal chuan tang zinga ṭhen­khat chu kum 90 chuang tawhte an ni tih sawiin, zahngaihna lantir tura an ngensak thu a sawi. "Punjab jail-ah hian damchhung tang tura thiam loh chantir mi 182 an awm a, state dang a mi 13 dah an ni bawk. Pawikhawihna liantham, firfiaka chetnaa inhnamhnawih vanga thiam loh chantirte chu chhuah theih an ni lo a, mahse pawikhawihna dang vanga kum 20 chuang lung in tang tawhte chungchang chu dan ang taka ngaihtuah nawn sak turin kan duh a ni," a ti.