J&K-ah Governor's Rule puan a ni

Jammu and Kashmir-a sorkar thar siam tuma BJP leh Peoples Democratic Party (PDP) te in­biakna a hlawhtlin theih loh avang­in kar kalta Zirtawpni aṭang khan Governor's Rule puan a ni.

Assembly inthlan result puan a nih aṭanga ni 16 ral hnuah eng party mahin sorkar thar an siam theih loh avangin, Governor NN Vohra chuan President thurawn angin Governor's Rule hi puan a ni ta niin a sawi.

Governor House thupuangtu chuan, "December 24, 2014 khan Chief Minister kalchhuak Omar Abdullah chuan CM a nihna aṭanga banna a lo thehlut tawh a, a banna hi pawmsak ni mah se, sorkar thar a din hma chu lo enkawl lailawk tura ngen a ni," a ti. Kar hnih liamta chhung khan Governor chuan PDP leh BJP hruaitute chu biain, sorkar thar siam dan tur chungchangte a sawipui a, mahse eng party mahin sorkar an siam theih tur thu an thlen thei lo a ni.

January 7 khan Abdullah chuan Governor hi hmuin, caretaker CM a nihna aṭanga ban a tum thu a hrilh a, hemi hnu hian sorkar siam thei an la awm loh avangin President remtihna angin Governor's rule hi puan a ni zui ta a ni.

PDP chuan sorkar thar siam dan chungchangah BJP central hruaitute pawh inbiakna a neihpui fo tawh a, mahse inremna an siam thei rih lo.

Omar Abdullah chuan an state-a Governor's rule puan a ngaih chhanah PDP a puh a, "Inthlanna hlawhtling tak kan neih hnuah hetiang boruak kan tawng hi pawi ka ti hle," a ti. Hetihlai hian PDP chuan Omar-a party, National Conference (NC) chu thutlukna dik lo siam tura nawrah a puh let thung.