Kum 5-7 hnuah Ganga lui thenfai a ni ang: Javadekar

Environment Minister Prakash Javadekar chuan New Delhi-a canchin thar lakhawm­tute a kawmnaah, Prime Minister Narendra Modi-a pet project, Ganga lui thenfai hna chu kum 5-7 chhungin zawh hman an beisei thu a sawi.

Nikuma Lok Sabha inthlanpui neih dawn khan PM Modi hian a campaign au hla-ah Ganga lui thenfai hi a hmang tel a ni.

Javadekar chuan, "Kum 5-7 chhungin Ganga lui hi kan thianfai hman dawn a ni. Kum sawmnga liamtaah khan Europe-a an luite khu tuna kan lui ang bawkin an lo bawlhhlawh ve tawh a, mahse thenfai tumin an bei a, an ti thei mai a ni. Chutiang bawkin keini pawhin kan ti ve dawn a ni," a ti.

Ganga lui tibawlhhlawhtu industry-te lakah na takin sorkar chuan hma a la dawn tih sawiin minister chuan, "Ganga lui tibaltu hi industry 764 an ni a, hengte hnenah hian hriattirna kan pe vek tawh a, an zinga 64 chu kharsak an ni tawh bawk. A dang pawh a ṭul a nih chuan kan kharsak zel ang," tiin a sawi. Industry kharsak zinga 56-te chu sorkarin infrastructure nei tura a tih ang an neih hnuah hawn an ni leh tawh a ni. Industry dangte pawh Ganga luia hnuhma an neihte enfiah turin March thla thleng hun pek an ni bawk.

Minister chuan sor­kar laipuiin ramchhunga boruak leh tui tibawlhhlawh ṭhinte khuahkhirh tumin hma a la mek a, tui leh boruak thiang­hlim tak kan dawn theihna turin a bei zel dawn a ni, a ti.