Hindutva leh sakhaw inleh chungchangin NDA a tihminghliau: Upendra Kushwaha

Central-a rorellai, BJP hruaitu leh MP ṭhenkhatte'n Hindu sakhua chawisanna lam hawia thu an sawi ṭhin te, sakhua inlehtir chungchangte chuan National Democratic Alliance (NDA) hmel a tibal a, a hmabak zel tur pawh a tichhia a ni tiin senior union minister Upendra Kushwaha chuan a sawi.

PTI in a kawmnaah, Kushwaha chuan sakhaw inlehtir chungchang chuan hmasawnna tura thil pawimawh zawkte a hliahkhuh a ni tiin, sorkar­in a ngaih pawimawh ber chu hmasawnna a ni tih an hriat ṭheuh a pawimawh thu a sawi. Hei vang hian sorkar leh Prime Minister Narendra Modi chu hmasawnna tur hna an thawh tir a ngai a ni, a ti.

JD(U) MP hlui, Loktrantrik Samata Party hruaitu, Kushwaha hi nikuma Lok Sabha inthlanpui neih dawn aṭang khan BJP nen an thawkdun a ni. Kushwaha chuan Hinduvatsa leh sakhaw inlehtir chungchangte hi thleng lo se chuan, Jammu and Kashmir-a assembly in­thlan neihah khan, Kashmir Valley-ah BJP chuan sorkar siam thei turin seat a lak theih ngei a rin thu a sawi a, heng thilte hi kalpui chhunzawm zel a nih chuan an chhiatpui zel dawn niin a sawi bawk.